Nesta seición trataremos de responder les entrugues más frecuentes que mos faigáis relacionaes col grupu, la música asturiana y tolos temes relacionaos. Podéis dexanos les vueses preguntes nel llibru visites o nel nuesu buzón.
1.-¿Qué sinifica Llan de Cubel?
A lo llargo la hestoria'l grupu hebio muncha xente (organizadores, receucionistes,...) qu'intentara camudanos el nome. La llista nomes qu'inventaren pa nós ye estensa y hailos de toa mena, peculiares y pintorescos comu "Yann de Cubells", asurdos comu Llan del Fumé y xeniales comu'l d'aquella receucionista que sabía daqué de francés y nos rebautizara comu Jean de Coubelle (hay papeles que lu atestigüen).
En fin, Llan de Cubel ye'l nome d'un monte de 678m na Sierra d'Árgoma que dixebra los conceyos de Pravia y Cuideiru y que ta abondo cerca la mar. Etimolóxicamente "Llan de" provién de la pallabra n'asturiano llende o llinde que s'emplega pa nomar montes, brañes, aldegues, etc... que suelen ser llinde, polo xeneral d'antigües fasteres de pación; asina tenemos n'Asturies Llendepín, Llandecarballo, Llandemires, etc...
El Llan de Cubel presidía dende cerca los primeros ensayos del grupu en Cuideiru y d'ehí...
2.-¿Qué representa y d'aú salió el llogotipu de Llan de Cubel?
El llogotipu del grupu, que podéis ver na parte d'embaxu d'esta y les demás páxines, ye un xabaril gaiteru. Esti gochu montés tan amañosu podréis alcontralu si visitáis la catedral d'Uviéu y esclucais con curiáu la sillería gótica de maera, pues ellí ta grabao. Tamién apaez un coneyu tocando la gaita y otros persimpáticos animalinos de folixa y faciendo veyures de tou tipu ente ellos. Vamos, qu'el grabaor al obispu diría-y "yo dexelos tocando la gaita"...
